Sumarlegur og góður snittubakki – fullkominn sem forréttur eða jafnvel bara þegar þú vilt hafa eitthvað létt í kvöldmatinn.
Ég hef verið að kaupa burrata ostinn í Costco, örugglega eina varan þarna inni sem er hægt að kaupa í stykkja tali. Hef ekki séð hann í neinni annari búð hingað til – ef þið hafið séð burrata ost annarstaðar, megið þið endilega láta mig vita 🙂
Snittubakki með ferskjum og burrata osti
Fullkominn forréttur á sumakvöldi
Hráefni
- 1 burrata ostur
- 400 g kirsuberja tómatar
- 40 g furuhnetur
- 1-2 ferskjur
- 2 baguette brauð
- 1 msk fersk basilika smátt söxuð
- 1 hvítlauksgeiri
- 3 msk hágæða ólífu olía
- 1 msk sítrónusafi
- salt og pipar eftir smekk
Aðferð
- Skerið baguette brauðið niður í sneiðar og penslið með ólífu olíu
- Setjið inn í ofn við 200 gráður í 10 mínútur
- Létt ristið furuhneturnar á þurri pönnu og leggið til hliðar
- Steikið ferskjurnar á pönnu þar til þær brúnast aðeins (hér má þurrsteikja eða nota smá olíu)
- Blandið saman hágæða ólífu olíu, hvítlauk, basiliku, sítrónusafa, salti og pipar saman í skálq
- Skerið tómatana í 4 bita
- Setjið tómatana á bakkann sem þið ætlið að bera fram á
- Setjið burrata ostinn í miðjuna
- Raðið ferskjunum ofaná tómatana
- Dreyfið furuhnetunum yfir allt og hellið svo olíu blöndunni yfir allt
- Opnið burrata ostinn og berið fram með snittubrauðinu
