Í fyrstu bylgju covid vorum við mikið uppi í bústað með mömmu og pabba. Mamma bakaði þetta brauð nánast hverja einustu helgi og kom mér á óvart hversu auðvelt það var að baka það. Engin hrærivél og ekkert hnoð. Draumur fyrir þá sem eru byrjendur í brauðbakstri. Mér fannst þó skipta mestu máli hvaða krydd er notað ofaná brauðið og tel ég mig hafa fullkomnað þessa uppskrift þegar Sesamgaldur frá Pottagöldrum kom í sölu.
Þegar ég var flugfreyja uppgötvaði ég svokallað beyglukrydd en eflaust margir sem hafa séð svoleiðis krydd á Tik Tok. Ég hoppaði hæð mína af gleði þegar ég komst að því að íslenska krydd fyrirtækið Pottagaldrar væri byrjað að selja krydd í líklingu við það sem ég hafði verið að kaupa úti og heitir það Sesamgaldur. Ég held ég sé búin að klára 3 svona stauka enda er þetta mikið notað á mínu heimili, ég nota þetta gjörsamlega á allt – með eggjunum, á avocado brauðið, heimagerðar beyglur, brauð og bara nánast allt sem ég get komið þessu á.
Auðveldasta heimabakaða brauðið
Búnaður
- Steypujárnspottur
Hráefni
- 1 tsk þurrger
- 1/2 l volgt vatn
- 600 g hveiti
- 1 msk salt
- Sesamgaldur frá Pottagöldrum
Aðferð
- Blandið saman volgu vatni og þurrgeri. Leyfið að standa í 5 mínútur.
- Í stóra skál, blandið saman hveiti og salti.
- Bætið þurrgersblöndunni út í skálina og hrærið vel með sleif.
- Setjið hreint viskastykki yfir skálina og leyfið að hefast í klukkustund.
- Þegar deigið er búið að hefast í 30 mínútur, stillið ofninn á 250 gráður og setjið tóman pottinn inn með lokinu á.
- Þegar deigið er búið að hefast, takið pottinn úr ofninum og setjið deigið ofaní pottinn.
- Setjið vel af Sesamgaldri frá Pottagöldrum yfir allt brauðið.
- Setjið pottinn inn í ofninn með lokinu á í 35 mínútur.
- Þegar 35 mínútur eru liðnar, takið lokið af og leyfið að bakast í 5 mínútur í viðbót.
- Hellið brauðinu úr pottinum á bökunargrind og leyfið að kólna.
- Njótið með ykkar uppáhalds áleggjum.
ef þú prófar þessa uppskrift máttu endilega deila því með mér með því að senda mér mynd á instagram eða jafnvel tagga mig í story @tinnath
